लुम्बिनी लायन्स vs पोखरा एभेन्जर्स

नेपाल प्रिमियर लिग २०२६ अन्तर्गत टियु क्रिकेट मैदानमा सम्पन्न खेलमा लुम्बिनी लायन्सले पोखरा एभेन्जर्सलाई ८ विकेटले पराजित गरेको छ। पोखरा एभेन्जर्सले दिएको ९८ रनको सामान्य लक्ष्य लुम्बिनी लायन्सले ११.४ ओभरमा मात्र २ विकेट गुमाएर पूरा गर्‍यो। सहज जितका साथ लुम्बिनीले अंक तालिकामा महत्वपूर्ण सुधार गरेको छ। लुम्बिनीको ब्याटिङमा कप्तान रोहित पौडेलले सर्वाधिक नटआउट ४७ रनको उत्कृष्ट पारी खेले। उनले ३२ बलमा ३ चौका र ३ छक्का प्रहार गरे। त्यसैगरी निरोजन डिक्वेल्लाले नटआउट २७ र डार्सी सर्टले १३ रन जोड्दै टोलीलाई लक्ष्यसम्म पुर्‍याए। पोखराका बलरहरूले लुम्बिनीलाई रोक्न कुनै प्रभावकारी भूमिका खेल्न सकेनन्। बलिङतर्फ लुम्बिनीका रुबेन ट्रम्पेलम्यानले ४ ओभरमा १६ रन खर्चेर ३ विकेट लिँदै विपक्षी टोलीलाई सस्तैमा समेट्न मुख्य भूमिका खेले। तिलक भण्डारीले २ र रोहित पौडेलले १ विकेट लिए। उत्कृष्ट बलिङ प्रदर्शन गरेका रुबेन ट्रम्पेलम्यान प्लेयर अफ द म्याच घोषित भए। पोखराका लागि चामिका करुणारत्नेले सर्वाधिक २५ रन बनाए पनि टोलीले सम्मानजनक योगफल बनाउन सकेन।